Chal Diye

Hum jab kisi se alayda ho jaate hain, maazi ke ek hisse ko thaam ke alayda hote hain. Agar woh jod mazboot thha, toh shayad dono ke liye hi wapas waisa ban jana aasaan nahi hota ek lambe arse tak-kyunki usi hisse mein, hum bhi hote hain ek tarah ke, aur woh shakhs reh jaate hain apni tarah ke.  Aksar hum yaadon mein, ek tarah ki dagaabaazi bhi karte hain jahan hum jeete jagte insaan ki tarah apne aap ko haalaaton aur sahuliyat ke saath badalte rehte hain, par shayad bakiyon ko jaise ek mom ke putle ki tarah bana dete hain. Aisa hone ke peeche ek wajah ye hai ki algaav ke kaaran hum unke baare mein jitna jaante thhe usmein full stop lag jaata hai. Zyaada se zyaada hum ek comma ke tarah rukte hain thodi der ke liye, phir chal dete hain aage.

Sochenge zara gaur se, toh aisa lagta hai maano uss maazi ke hisse ko ek painting sa rakh liya hai- hum usmein ab rang toh nahi bhar sakte, lekin agar chaahein toh ussey alag nazariye se dekh- parakh sakte hain. Waqt-bewaqt ye sawal man mein uthta hai ki humein dukh kis baat ka hota hai- uss painting mein aur manchaahe rang na bhar paana ya uss painting ka dheere dheere bhooli bisri yaadon ke puraane store-room mein chale jaana? Dono hi sooraton mein, dilchasp baat toh yeh hai ki waqt ka haath thaam kar aage hi chalna padta hai. Shuru shuru mein, rang na bharne ka dukh zyaada chotil karta hai kyunki tab aksar ye sochte hain, agar aisa rang bharte toh kya hota, kya ek kona bigadne se poori painting kharab hoti hai, wagerah-wagerah. Ahista Ahista, zindagi ki shaakhon par naye phool bhi khilne lagte hain- kabhi koi rang, khushboo ya kaante, wapas humein us store-room mein le jaate jahan woh painting kayi aur cheezon ke saath dafnaaye huye hain. Kabhi aisa bhi hota hai, ki aap bas ussey dekhe hi jaate hain aur waqt apni tarah aage chal deta hai.

Aksar, hum samajhdar logon se naasamjhi ki ummeed nahi rakhte hain. Aap sochenge, ki do samajhdar logon ke beech agar kuch bigad bhi jaaye toh who sambhal lenge apni samajhdari se. Kaafi hadd tak, ye sochna sahi bhi hai. Lekin haalaat tab bigad jaate hain jab do samajhdar log ya toh ek saath naasamajh ban jaaye ya phir zyaada samajhdaari ke chalte sabse aasaan, seedha rasta nazar andaaz kar de. Tabhi ek gaanth lag jaati hai- kabhi kayi chhote chhote gaanth ek bada gaanth ban jaata hain, kabhi ek bada aur ziddi sa gaanth hi kafi hota hai.  Aise mein dhairya bohot zaroori hai. Aap dheere - dheere, chhoti - chhoti koshishon se gaanth khol sakte hain ya waqt par nirbhar ho jaate hain ki uske bahaav mein, girhein thodi se sulajh jaaye.  Par jab kuch bhi na ho, tab kya kiya jaaye? Kahin na kahin toh jaana hota hai- haalaton se aage ya wajah aur soch ke peeche. Dhoop chhanv jaise unhe do hisson mein baant dete hain magar hote toh woh saath hi hain kyunki jahan dhoop hai wahan chhanv bhi hoga. Chaar kadam aage badhne ke liye maazi se seekh kar hi aage badhna padega. Bas ek baar, chalne se pehle, niyati se aur khud se ye sawaal karna-  Kahaan Chal diye?